عبيد

بالقلب صرخه وفي المعاليق منشار
وبركان ثاير في الخفي من عروقه
وفي العين مزن وهماليل وامطار
يحدها حزني  ويوفي حقوقه
اليا تذكرتك  ياوافي الاشبار
جزعت وحلو النوم ما عدت اذوقه
هداج يمناك وايسرك الانهار
محياك فيض النور والخير شوقه
يا مسندي ياعزوتي يا سيد الدار
ياللي عليك الروح تقطع بنوقه
يالوايلي ياتاجي يا نسل الاخيار
اللي عن الطولات ما شي يعوقه
ما بيني وبينه ايام ومسفار
اصبح غريب ديار والطين فوقه
ودعتك الله هو عليم بالاقدار
ودعتك الله وانت للعين موقه
ماعاد تسوى دنيتي ذرة اغبار
متساويه غرب الشمس مع شروقه
تلملمت بالجوف مرادم من النار
ياكيف اداوي خاطري من حروقه
كان السعد بي ماكره ثم طار
من بين ايديني شلع مع اسبوقه
عزيت نفسي فيك يالوافي البار
وعيني على سكب المناهل دفوقه
وعزوني فيك اجواد من كل الاقطار
ولا الردي غير العصا ما يسوقه
واولادك الغالين شعله للانوار
غيث السما ياللي يتلاعج بروقه
الطيب معدنهم وملفى لكل خطار
وعلومهم لكل المفاخر سبوقه