انا
البوادي وانا الغرابيب الرواسي
وانا الغدير وانا السهل والميادين
وانا الضياع اللي حافي مداسي
وانا الدراويش وكوخهم والمساكين
وانا المشرد اللي مرتق لباسي
وانا الجياع اللي على الخمص طاوين
وانا الذي في وائل ٍ طال ساسي
وانا ذي قار وانا مؤته وحطين
من دم صافي ما تخالط اجناسي
معد
ولي دونه جدود ٍ عربين
مابغى يقولون انا لي قلم ماسي
ولا بغى اشتهر ولا بغى كثير الدواوين
اهيم في البيداء والراس حاسي
اشعث ولا يملك خيول وبعارين
افطر في مطلع الشمس من قرص عاسي
اضمي ولا ارد بيار الماء يومين
رفيق الاوابد بالليالي الاغلاسي
في الليله السحما على النار ملفين
ولاني بسالى كل غالي بناسي
احباب قلب وهم على الروح غالين
واليوم حطمني الوقت وشلع اضراسي
ماعاد به يسوى من الايام قرشين
لا افترس ولا يطيب افتراسي
اللحم مر ولا بقى كود عظمين
يومن نهضت وعيا زماني ارتكاسي
ايقنت اني مع القوم فانين
ولا رد من الموت من جاء يواسي
ولا عادت الروح وان قيل تكفين
اكتب ومن الغيد معلن افلاسي
طفلات ٍ حواري كنهن من عليين
وابكار وثيب وناهدات وعناسي
نجل العيون ويذبحك اثمد العين
اكتب على صفحات اوهامي اطراسي
من نبض قلب اذا امعنته يبين
ليست هناك تعليقات:
إرسال تعليق