يالغالي الغايب ان جابوا طواريك
ما قدرت عيوني تخفي مسيله
اشيح انا بوجهي والقلب يبكيك
فقدك عظيم وماباليدين حيله
الروح من بين الحنايا تناديك
ليته قريب ديار والله لجي له
بالعالم الاخر صارت اراضيك
لو هو ورى البرزخ عيوني تخيله
تمرني ذكراك واهوجس واحاكيك
ومن دونك الايام مره وثقيله
لو تنفدى بالروح والله لفديك
والعمر من بعدك اعداله فتيله
العذر منك اقبل اعذار مغليك
حيث الدموع بحق مثلك قليله
يا عبيد عسى الوبل يسقي روابيك
يسقي قبر غالي وذيك النثيله
دعيت ربي يجافي اللحد جنبيك
يصبح براح والاغصان الضليله
ورضوان بالفردوس يهلي ويحييك
مع الابرار يطيب فيكم نزيله
يا ليت شعري اكحل شوفي بعينيك
لكن معي الايام دايم بخيله
لالا تظن ناسيك يوم ٍ واناا خيك
جسمي مع اطرافي لفقدك نحيله
يالسامي الغالي يالنخبة معاليك
ياصفوة الاجواد راعي لطويله
الطيب طبعك وهيبة الجود يكسيك
يا عزوتي يا فخر كل القبيله
لي عين ترقب من يمة نواحيك
كني سمعت النجر او ريح هيله
لك رب بجنة الخلد يجزيك
ولا خاب من كان ربه وكيله
ليست هناك تعليقات:
إرسال تعليق