ياعبيد ياراعي العلوم الحميده
في وصف طيبك قاصرات القصايد
دعيت ربي من الوهايـب يزيده
ويسقي ثرى داره مزن عوايد
هات القلم واكتب على ما اريده
اكتب وسطر من جوفي النشايد
خط لي من بين الحنايا قصيده
ابى اشكيه ظبي ساهي الجفن نايد
اشوفها تنسى وحياته سعيده
وانا يامسندي حياتي زهايد
ليت الحشا وناظري ما يريده
وياليت دمعي ما انسكب عند بايد
لكن قلبي له يدوي رعيده
يطلبه لو حالت دونه شدايد
الجفا عند الترف صاير عقيده
والهجر يجني منه قل الفوايد
الله لولا الحيا بعالي صوتي انادي
ياساره ردي فؤادي ماعاد فيني جلاد
لو هي درت بحالي وش سوت في فؤادي
كان مافارقتني ولا نوت بعاد
الساكنه في حشايا ما أنصفتني ودادي
من حبه اسهر الليل ماعرفت السهاد
مشتى ساره القرايا وفي الربيع الحمادي
بدويه حضريه عشقي لها جهاد
لعوب ورود في مشيه الياقامت تهادي
لو عشقته صغير بكيته بالمهاد
قلبي يفز من طوره مثل طير الهدادي
اليا قامت تثنى وقع عنده وكاد
تختلج نفسي ويساورها الامل
ليا طلبت انا موعدها الخجول
جيتها ضامي من عجاف ومحل
عل وعسى ضما خفوقي يزول
واسئل عن حاله لوهو ماسئل
واتحرى باللي بخاطرها يجول
قريت في نظراتها ريب وجل
قالت انت قلي وش تبغى تقول
قلت السموحه عسى مافيكم زعل
اضني ماخطيت ولاني لك خذول
وجيتك كلي شوق وعشقي اكتمل
مثل كوكب مايعرف نوره افول
له مقام مع سهيل ومع زحل
ما تهزهز اركانه جسر حمول
قالت حبي يقرب عليك الاجل
وابغى عمرك من شان حبي يطول
وتذكر قوامي وخصري و النجل
والجدايل وعطبول وظلم عسول
قلت اعترفتي قالت ماقل ودل
هذا شرطي او احط ابواب وقفول
بالمهل ياشوق عيني بالمهل
هذا قلبي مابين اياديكم يجول
ازهر الخدين بظراته خجل
قلت وقالت الجفا لازم يزول
مشتاق ياعنازا وانا جيت زاير
ماني غريب والعجب تنكرينا
رسوم دواثر في ربوعك محاير
ما هن قديمات لو ماضيهن سنينا
هذي مشاتي الطيبين الاخاير
واليوم تحت الثرى مرتكينا
على قبر دعاس هليت العباير
جدي الا يادار لا تسفهينا
والله ما ننسى لو تدور الدواير
وشلون تنسى الاسود العرينا
عرفنا رسومهم والرسم باير
ياكنهم في روابيها جايلينا
مقاحيم اذا ما الموت جاير
لهم من روس الامجاد الجبينا
كني بهم على وضح نواير
وصفر ومجاهيم وغر ولجينا
روعت قلبي رجوم عماير
نشدتهن عن علمهم علمينا
صامتات ما جاوبن قلب حاير
من ذكرما خفى منهم علينا
من عقبهم صارت بلاقع نثاير
عزيزات عندنا والاحقينا
