مثل الصبح مستوطنه روح الانفاس
مثل الشروق اللي افترش نون عيني
يا النرجسة عقب السهر رمش حساس
طبتي وطابت في وجودك سنيني
احلى صباح بشوفتك غصن مياس
عقب الاماسي بشوقها تحتويني
عبق الخزامى همسها
يملي الراس
كل الحروف اليا حكتها تـزيــنــي
ان عاتبت تنثر عتبها من الماس
وان ضحكت كن الذهب له رنيني
جيت اتفقد صبحها واشرب الكاس
واقول من عمري ليدينك خذيني
تكحلي بي اثمد لجفن نعاس
مري على سطح المرآه اكتبني
لذاتي قريبه لوني بعيدٍ عن الناس
ما اقدر اقول ان ذاك الغزال يعنيني
جابتني الصدفة على حرف الاطراس
قريت وصافحت يمني جبيني
وين الزمن ابطا بك خلف قرطاس
كني ضرير عن خدود اللجيني
اي والله اعشقك يا طيب الساس
اقولها بخط ٍ عريض ٍ مبيني
يا احلى صباح ٍ ينثر الورد بأجراس
واحلى شروق في حياتي يجيني
