نسيم صبحي

توني عرفتك وفي حشا القلب تسري ونبض الخفوق اللي تحيابه شرايين  ونسيم صبحي ينشرح فيه صدري وروض العمر اليا امحلن البساتين انا النخيل وبتربتك  مد جذري  وانا السحاب اللي تلمينه باليدين  وانا الخطايا فيك وانتي اسباب عذري  وانا الرياح اللي وشووشتها الرياحين  وانا الرمال اللي على البيد تذري  وانا القوافل في الصحاصيح ماشين  وانا الجنون اللي سرى معك بدري وانا الهذراي اللي حكوها المجانين حتى ان عرفتي لا تقولين ادري  القى لك عذر وانتي بدروب  المقفين

هذريت ماكنيت

 

ارخي اعنان الحرف من فوق الاوراق

او سيل انحدر من جال هاك السفوحي

ولا شهاب يعتلي فوق الافاق

او برق لعج يتلاه وبل ٍ يسوحي

حلو المذاق اليا تحلته الاذواق

كن الحوى به والخزاما تفوحي

اريجها ينثر سماها بالاشواق

مكمي اسراره للمفالي يبوحي

يهيم ضامي حافي كاشف الساق

يسئل وحوش البر من شاف روحي

  يالجامحه حظي ماجاني بالاوفاق

زرعي هشيم ومدمرات ٍ صروحي

اجالد بذاتي ولا الفجر واق

الصبح ابطى لا يجي منه ضوحي

والليل طال ومضيع الدار منعاق

حل المشيب ويطعن طلعه طموحي

يسند بي على منيفه بمناشيب معلاق

يحدربي على وادي السافي يكوحي

هذريت ماكنيت لايق او مالاق

خل قلبك ياترف الصبايا سموحي

نجوم كذابه

 

مدي للغروب اسباب

بلكي الشمس ما تندس  ورى غابه

بلكي الليل يبقى هناك

غافي مسكر ابوابه

لان الليل معه حزني

معه صوتي

معه جرحي

معاه نجوم كذابه

تجي في ليل

ومعه ترحل

وفي قلبي تنوب ذياب

مدي للوصال اسباب

خليني اشوف مسحابه

انا كني

جذع خاوي

جذر مفارق اترابه

على صدره وشوم طعون

حفر فيه الزمن اخدود

وعشعش فيه سنجابه

مدي للرحيل اعتاب

جحافل مالها تالي

تجي مثل المطر تجتاح

سيول بقوم نهابه

مدي لي

كفن ابيض

مثل غيمه وحيده فوق

ما قدرت تضمها الزرقا

لعل النعش يهنا به

مدي لي زند حطاب

مدي رمح ونشابه

اما في يدينك فاس

لهذا القلب حطابه

خوذيه ولا ترتعش كفك

النار تغطي اعيابه

دفى ولا تبرد ايدينك

لان الجمر به ونسى

اذا ما فارق اصحابه

زرياب

زرياب غني

خذ اوتارك من وريدي

واعزف لها ان نبضي قد تضائل

زرياب غن لي هذا المساء

 احتاج صوتك فأن احاسيسي تسائل

سيكون لحنك شيئا من همس المفازه 

خذ بيدي او دلني كالطير ضيعت الموائل

زرياب غني

عل سيدتي تجيء

ماعدت املك من بدائل غير صوتي والرسائل

في الليل اكتب حرفا من نثر جنوني

ولا اكتبها مرتين

أي لا اعيد النظر فيها

ودعتها الرفوف في كتاب الهذيان

زرياب غني

قد حل فصل الخريف

ايه دمعي

فتش جيوبك

تلقى الهدايا من زماني

واقرها بخلوتك

ترثيك القصيده

فيها عزف الناي وونات الكماني

وبين سطورها تلقى الدمعه وحيده

ان طلبته جاني دمعي ماعصاني

ايه دمعي امطر بقاع البليده

والسراب اللي تبعته ما سقاني

من يجيبك من هاك الارض البعيده

كل حرف منك كتبته كواني

حطم ضلوعي وغدت روحي طريده

وانت تسكب حروفك

مخطي ومداني

اسئل الورقا وان غنت علجريده

تعال واسمع خاطري لوهن ثواني

خلني اوريك الاشياء المفيده

هات عمرك فوق ميزان الاماني

من يسومه منك وايامك زهيده

لا تقول اعشق ورود الديدحاني

ولا تقول ان نبض قلبي يريده

خلها

ومخباك به بير وسواني

واغسل جروحك عن علوم المكيده

خذ نصيحه

وان تلعثم به بياني

خله عنك ولا تفتش عن بريده